De Rogstaekers Aod Preense Club bestieët in 2015 5 x 11 jaor. Van alle aod-preense és ‘n unieke plevuus gemaaktj di-jje kuntj trökvînge inne bestraoting vanne binnestad in Wieërt. Beej de VVV inne Brunawînkel oppe Mêrrentj, kefee De Tramhalt, Maasstraot 46 en Babyspeciaalzaak Bambino, Maasport 15 és de wândelgids “Rogstaekers Aod Preense Plevuûze Paad” te koup. Alle informatie oeëver de aod-preense en aod-jeugdpreense en nog völ mieër vingdje trök oonger de knop Plevuûzepaad op dieës website.

De Rogstaekers Aod Preense Plevuûze Paad és ‘ne wândelpaad doeër de Wieërter binnestad dae gein indj kintj. Det keumtj umdetter eder jaor weer ‘n now plevuus beej keumtj. Mer boeëvenâl és ‘t e kûnstzinning ongerwiêsproject mét ‘n wândelroute di-j gebazieërdj és op e belangriêk stök Wieërter volkscultuur: de vastelaovendj.

Mieër as 70 plevuûze gaeve de route aan. Dieës plevuûze zeen ontwôrpe doeër lieërlinge van Wieërter basisschoeële en klânte van Atelier 88 vanne Stichting PSW Midde-Limburg.
Eder plevuus és dus uniek!

Op eder plevuus zeeje naeve ‘t einmaolige ontwêrp ‘t logo vanne stadsvastelaovendj-vereîniging de Rogstaekers en de name vanne aod-preens en aod-jeugdpreens mét ‘t beejbehuuërendj jaortâl.

Centraal pûnt inne route és de Mêrrentj, woeë de plevuûze ligke vanne ieërste Rogstaekerspreens Guille I (Poell 1937) en de ieërelede aod-vorst Jan Coenen (vorst van VV de Rogstaekers van 1963 tot en mét 1985) en aod-regênt Jo Bergmans (regênt van VV de Rogstaekers van 1985 tot en mét 1988).

Inne Rogstaekers Aod Preense Plevuûze Paad-wândelgids stieët beej de foto van edere aod-preens ‘n QR-code, zoeëdejje mét ‘ne smartphone nog mieër achtergroondinformatie kuntj scanne.
Via dieës website és de léste actueel informatie beschikbaar en nog völ mieër.

Oonger de gegaeves vanne aod-preens en de aod-jeugdpreens vingdje informatie oeëver noetsfeite en hoeëgtepûnte van ‘t betreffendje jaor.
De gegaeves oeëver de jaore 1937 t/m 1993 zeen ontliêndj aan ‘t bukske “Wieërter Vastelaovundj vanaaf 1870” (auteur Huub v.d. Bosch). Vör de jaore vanaaf 1994 zeen gegaeves uut de jaorverslage van VV de Rogstaekers gebroêktj.

Hejje nog tips of wildje reagieëre? Kliktj dan heej.

Vae hoeëpe dejje geneetj van ‘n schoeën wândeling doeër de Wieërter binnestad, de kûnst-utinge vanne Wieërter schoeëljeugd en tegeliêkertiêd kinnis opdootj oeëver de Wieërter vastelaovendjcultuur.

17-11-2016
Rogstaekers Aod Preense Club