Ronald I van Andel geïnstallieërdj as sirremonie-meister

12 February 2020

Ronald I van Andel geïnstallieërdj as sirremonie-meister van de Aod Preense van de Rogstaekers.

Tot groeete vurrassing van alle Aod Preense en zieeker van Ronald I van Andel zelluf,

ès op de Aod Preense Daag 2020, Ronald I vuurgedrage en unaniem gekoeeze tot

sirremonie-meister van de Aod Preense van de Rogstaekers.

Un zieer vurantwoeerdelukke taak di-j hae de rest van de middig en de aovundj

tot groeet genoeege van alle Aod Preense, fantasties hieet ingevöldj.

Ein van zieen ieerste taake woor, de nowe Rogstaekers Preens Tim I en zieen Maegdje Myrthe

oonger de klanke van unne geweldjigge gezoonge klapmars, binne te lei-je.

Ut oongerscheid tösse de muzikante van de Kepel en Aod Preense

kosse tot laat oppe aovundj good uut ein haoje,

want de Aod Preense mochte pas nao de kepel de kefees in.

Vör um good te herkinne , hieet hae un hertstikke schoeen gaffel

met unne Rog d’r boeeve op, gekrieege.

Ronald I ès beneumdj vör ut Laeve.

Zieene uitbundige lach getuugdj d’r van wi-j bli-j hae met diees beneuming ès.

Names de Aod Preense : Aod Preens Ronald I , hieel völ Suukses!

Rogstaekerspreens 2020: Tim I

26 January 2020

25 januari 2020

Vorst Stan lègktj functie nieër

3 January 2020

Vorst Stan van V.V. De Rogstaekers és genoeëdzaaktj zien functie as Vorst en vuuërzitter per direct nieër te légke. Gewiêzigdje umstandighede op zien wêrk en ambities ligke heejaan ten groondslaag. Alle take van Vorst Stan zölle waere waorgenoeëme doeër Kanseleer Jasper.

Zichtbaar ontreûrdj hieët Stan Ockers in good oeëverlégk met de oeëverige besteurslede van V.V. De Rogstaekers ’t besloêt mótte neme um zien lidmaatschap te beëindige. De take en verântwoeërdelikhede di-j huuëre beej ‘n gewiêzigdje wêrksituatie make ‘t vör hem onmuuëgelik um daonaeve de functie van Vorst en vuuërzitter uut te bliêve oefene. ‘t Feit det dit in ‘t begîn van ‘t vastelaovendjsezoen gebuuërtj toeëntj aan det ‘t neet ângers kós. Gehieël volges de statute és ’t aan Kanseleer en vicevuuërzitter Jasper Heesakkers um de take waor te neme.

Stan Ockers (36) woor in 2012 Stadspreens van V.V. De Rogstaekers. Nao zien tówtraejing tot de vereîniging in 2014 vólgdje in november 2017 zien installatie as Vorst.

Frank II Rogstaekerspreens 2019!

15 February 2019

Rogstaekerspreens

Op zaoterdig 2 fibberwarie jl. woôrt aan ‘t indj van ‘ne fantastische Gala Boonte Aovendj in ‘t Munttheater, doeër Vorst Stan van Stadsvastelaovendjvereîniging de Rogstaekers, de 75e Stadspreens van Wieërt uutgerope.

Frank van Dooren zâl de Wieërter vastelaovendj in 2019 vuuërgaon as

Z.D.H. Preens Frank II van de Rogstaekers

5×11 jaor gelieëje woôrt de nowwe Hoeëgheid as échte Rogstaeker geboeëre aane Koeëremêrrentj as zoeën van Jan van Dooren en Ploon Eestermans. Ziêne opa woor ‘meister Van Doeëre’ uute Schoeëlstraot. Nao înkel jaore verhoêzje ‘t hoêshaoje Van Dooren, met broor Pieter en zöster Marielou nao Kieëntj en allewiel woeëntj de Hoeëgheid aane Leenhof 25 op Luuëke.

Op 23-jaorige laeftiêd hieët Preens Frank II zien leef vraw Nic lieëre kinne, ‘n geboeëre Braobentjse woeëmej hae twieë prachtige zuuëns hieët gekrieëge: Luc en Yor. Schoeëndochters Rianne en Elle zörge vör nóg mieër gezelligheid in Hoêze Van Dooren.

Aod Preense zétte Phil I aan ’t wêrk

7 February 2018

Foto’s: WeertdeGekste

De Rogstaekers Aod Preense haaje zaoterdig 3 fibberwari ’n verrassing vör stadspreens Phil I in petto. Mer vör di-j verrassing mos Phil wul de hang uut de mowwe staeke. De Aod Preense haaje beej kefee Tramhalt vör Phil I ’n donatie klaor ligke. Ze donieërdje mer leefst € 555,55. Ze oongerstuuëndje daomej de CliniClowns-actie di-j de stadspreens op taw hieët gezatte met zien vastelaovendjlidje. As tieëgeprestatie mos Phil I wul 50 cd’s signieëre. Dao kos Phil naoteurlik gein nein tieëge zegke en hae ging dan ouch drek aan de slaag.

Rogstaekerspreens Phil I Aspers uutgeroope

14 January 2018

foto: Loes Mennen

Stadspreens 2018: Preens Phil I van de Rogstaekers

Op zaoterdig 13 jannewari 2018 woôrt, vör ‘t ieërst doeër Vorst Stan van Stadsvastelaovendjvereiniging de Rogstaekers, Phil Aspers uutgeroôpe tot Stadspreens Phil I.

De muzikale Rogstaekerspreens és zieëker geine onbekindje in ‘t Wieërter uutgaonscircuit.
As DJ drejdje hae al in meînig keffee en op völ fieëstjes.
Hae és prizzentator van ‘t gezélligste festival van ’t lând: Bospop en stóng oppe plânke vanne Boonte Aovendje van V.V. de Brökwagters. Daonaeve és hae optochtdaelnemer met V.V. Hallûf Aaf, mer völ vastelaovendjveerders zölle ‘m vuuërâl kinne as zênger van ‘t populaire ‘Moerepetazie’.

De 31-jaorige Hoeëgheid és ‘ne zoeën van Frans Aspers en Ine Martens en grujdje op inne Wieërter wiêk Bosseve.
Vader Frans woor beej meînig Wieërtenaar bekindj as vuuërmaolig spits van Wilhelmina ’08 en FC Oda, woeë ouch Phil zelluf regelmaotig tieëge ‘ne bâl hieët gestâmptj. Mooder Ine grujdje op inne stad, in ’t bedriêf van heûr aojers, Garage Bloemen aane Remundjsewieëg.

Tiêdes ‘n Moulin Blues-festival in d’Oospel lieërdje Preens Phil I zien vrîndin Nicole van Bogget kinne. Nicole és ‘n geboeëre en getoeëge Ni-jwieërse en ‘n dochter van Thieu van Bogget en Cathy Vossen. ‘t Stêl woeëntj same oppe Stellingmolen 37 op Muuëlenakker.Ofschoeën opgelédj tot gymlieëraar wêrktj Phil I oppe meziekaafdeling van BCM Music Systems op Kampershoek woeë m’n meziekcomputers en software bawtj vör de horeca en Retail.

Nôwwe Vuurzitter Lennart 1e. Léon 1e ieërevuurzitter

27 November 2017

Op 26 november 2017 is Lennart I Stultiens (2014) unaniem verkoeëze tot nowwe Vuurzitter van de Rogstaekers Aod Preense. Hae volgtj Léon I Tobben (2004) op dae nao 12 jaor vuurzitterschap de hamer hieët oeëvergedraage. Tiêdes dezelfdje vurgadering is Léon I beneumdj tot Ieërevuurzitter van de Aod Preense. Vae wînse Léon I völ plezeer in zien nôwwe rol en Lennart I völ sukses as Vuurzitter (det zal hae noeëdig hebbe).

Aod Preens Stan I Ockers geïnstallieërdj as Vorst van V.V. de Rogstaekers

23 November 2017

Zaoterdig 11 november és Stan Ockers tiedes Vorst oppe Troeën geïnstallieërdj as 5e Vorst van V.V. de Rogstaekers.
Met de volgendje wuuërd wiltj hae eedereîn bedânke vör alle fillecetaties, bloome, kaarte en âl waat hae nog mieër hieët mooge kriêge.

Leêf Rogstaekerinnekes en Rogstaekers,

Gruuëts, hinnevêl, dânkbaar.
Det zeen wuuërd woeëmej vae prebieëre te umschriêve wi-j vae de aafgeloûpe daag belaeftj hebbe.

Zoeëvöl enthousiaste minse inne zaal, zoeëvöl fillecetâsies, kaarte, bloome, kedoos en berichtjes.
Zoeëvöl wêrmdje, zoeëvöl leêfdje vör oeëze schoeëne Wieërter vastelaovendj.

Waat zeen vae Gruuëts det vae dit mej moôge make, ’t Hinnevêl stieët tot op plaatse woeëvan vae neet wiste det ze bestónge.
Mer vuuërâl Dânkbaar, det vae dit as gewoeëne Wieërter jóng en maegtje mej moôge make.

Vae wille uch dânke vör eur enthousiasme, wêrmdje en vertrawwe.

Vae bliêve nog efkes op dae wôlk roôndzweve en dan gaon vae…. Draaaan!

Laote vae same de verbînging zeûke en zörge vör de instândhaojing van oeëze Wieërter vastelaovendj en ’t Wieërtlands dialect. Laote vae gruuëts zeen en bliêve.
Laote vae op de klânke van ‘n gooj kepél, deîndânger lekker ónger de êrm neme, oeës aûge laote straole en al sjoenkelendj de tówkomst tieëgemoôt dânse.

Maaktj lôl en plezeer op ‘n nette meneêr… Laeve de Rog, Vivat oeës Wieërt!

Ouch names Charlotte,

Eure Vorst Stan

Aafscheid Aod Preens Stefan I Jacobs as Kanseleer van V.V. de Rogstaekers

23 November 2017

Afscheid Kansleer

Voorafgaande aan de installatie van Vorst Stan, werd afscheid genomen van Stefan Jacobs in zijn hoedanigheid als ‘Kanseleer’ van V.V. de Rogstaekers.

Op het podium werden de versierselen ingenomen en kreeg Stefan de ‘hoêsorde’ uitgereikt als blijk van waardering voor zijn verdiensten.

Aafscheid Vorst Jan Stroek

23 November 2017

Op vastelaovendjdieënsdig 2017 hieët vastelaovendjveêrendj Wieërt massaal aafscheid genoeëme van Vorst Jan.

Names de optochtdaelnemers, kapélle en hermeni-je woôrt ’n plaquette aan ’t Rogstaekersmonumênt aan Vorst Jan aangeboeëje. Dieës plaquette, ontwôrpe en vervaardigdj doeër Diana Keulen-van der Linden symobisieërtj Vorst Jan vuuërtreffelike: De groeëte toêt di-j Jan altiêd geblaoze hieët en woeë dejjae ‘m inne tówkomst weer met zöltj tieëge kaome. De scheûnkes staeke d’r ónger uut en de Vorstesteek troeëntj boeëve te toêt uut.

Vervolges kóste de minse de Vorst persuuënlik bedânke tiêdes ’t Lindeboom Fieëst oppe Mêrrentj. Verschillendje zöstervereiniginge, bevrîndje SLV-vereiniginge en neteûrlik de Wieërter vastelaovendjveerders trókke oeëver ’t podium van Vorst Jan.

’n Absoluut hoeëgtepeûnt woor de serenade van de super-kapél. Ónger leiding van Tjeu Snoek begóste 6 muzikânte te spuuële, woeënao de oeëverige Wieërter kapélle via de Koeëremêrrentj de Mêrrentj optrokke. Vorst Jan heêl ’t neet druuëg mer ouch Slivvenhieër mós ‘n träönke laote.

Vuuëraafgaondj aan de abdicâsie woor ‘n delegâsie van ’t SLV-besteur presênt um Vorst Jan te beneûme tot “Ieërelid van SLV” vör al zien verdeênste vör de Wieërter en Limburgse vastelaovendj.

Tiêdes ’n emotionele abdicâsie zónge Monique Knapen en Ronald Moonen ’n prachtige aubade vör Vorst Jan en daonao woor ’t aan Ieëre Vorst Ton, Opper-Opper-Rogstaeker Börgemeister Heijmans en Kanseleer Stefan um Vorst Jan te ontdoon van z’n teikene van waerdigheid. Heejmej kwoom ’n indj aan 12 jaor Vorst Jan Stroek.

Tot slot woôrt ‘oeëze Jan’ doeër Kanseleer Stefan, names Stadsvastelaovendjvereiniging de Rogstaekers, beneûmdj tot Ieëre Vorst.