Berichten

Stadspreens 2025: Stefan II Wolter

79e Stadspreens van Wieërt: Stefan Wolter

In 2025 zingtj Stefan Wolter as Stadspreens Stefan II vanne Rogstaekers ’t hoeëgste leêd tiêdes de vastelaovendj.

Traditiegetraw woeërt de nowwe Stadspreens uutgeroope aan ’t indj van de vernówdje en mieër as  geslaagdje Gala Boonte Aovendj.
Nao ‘n sketch vôl humor en meziek blieëk de 34-jaorige rasartiest en vastelaovendjveerder pur sang de nowwe vuuërgaenger vanne Wieërter vastelaovendj te zeen.

As zoeën van Jack van Twan en Toos Wolter en Lysanne van Jacques en Thea Roost vanne Stroêjscheur in Ni-jwieërt woeërt ‘m de vastelaovendj al as wécht mejgegaeve.
Opa en oma Wolter woeëndje vreuger inne Wilhelminastraot dus woeërt, same met zösterkes Sanne en Daphne, de Groeëte Rogstaekersoptocht oppe Driesveldlaan bekieëke. Heej schoeët de kleine Stefan as cowboy of indiaan met z’n pertungskes oppe daelnemers. Later deej Stefan, same met de vettigste vereiniging van Wieërt, V.V. Vétkej, mej aan meînig optocht.

De nowwe Preens van Wieërt és getrawdj met Iryn Janssen, ‘n echt ‘Meerminneke’ uut Zuuëmere.
De wichter James van bekans 4 jaor en de twieëling Lennon en Charlie van bekans 2 jaor zörge, same met de uutbundjige Stefan, vör ‘ne laevendje boel in hoêze Wolter aane goojekoupe kânt vanne Kazernelaan.

In ‘t dageliks laeve guftj Preens Stefan II les oppe groeëte-minse-schoeël in Indjevve, de Fontys University of Applied Science, daomej drék verwiêzendj nao ‘t feit det hae és opgelédj as docênt Îngels, want eigelik ésj gewoeën Fontys Hogeschool.
In zieëne spaarzame vreeje tiêd traintj de Hoeëgheid z’n aod volleybalteam Stravoc-VC Weert Hieëre 1 en moog hae gaer optraeje as zênger of prizzentator. Dét léste keumtj nao vuuër in zien

‘Orde vanne Zîngendje Zwetser’

Now beej De Rogstaekers és det de Stadspreens al beej zien uutrooping zien adjudânte kos prizzentieëre.
As ‘Sirremoniemeister’ zâl Rick Arts (getrawdj met Chantal) optraeje, de ‘Ordebewaarder’ és Martijn van Buggenum (getrawdj met Sanne) en Joost Verheijden (met vrîndin Kimmy) és de ‘Klei-jermeister’. ‘Schatbewaarder’ Brent Verschuuren (met vrîndin Sofie) maaktj ‘t kabinet vanne Preens complieët.

Op zaoterdig 1 mieërt zâl Stadspreens Stefan II op ‘t Stadhuis de Stadssluuëtel in háng kriêge. Daomej kriegtj hae vör drej daag de Macht oeëver Wieërt en zâl hae de vastelaovendj 2025 vuuërgaon ónger zien devies:

Dit és zoeë schoeën, baeter gaon vae ’t neet kriêge!

Rogstaekerspreens 2024: Ruud I uutgeroope

In 2024 guftj Ruud Teunissen as Stadspreens Ruud I vanne Rogstaekers kluuër aan de Wieërter vastelaovendj.

Ruud és de zoeën van Frans Teunissen en Annelies Kuijpers en ‘ne kleînzoeën van Daan Tuuënisse vanne Binnemuuële aane Wilhelminasingel. Hae és 50 jaor gelieëje geboeëre in ’t Sint Jans Gasthoês aane Voeëgelsbleîk. Völ minse zulle ’t hoêshaoje Teunissen kinne vanne “Koffieshop ‘t Trefpunt” inne Mûnt, tieëgenoeëver de Albert Heijn.

Jaorelânk woeër Ruud e bekindj gezicht inne horeca van Wieërt en daoboete, tot e jaor of drej gelieëje Corona root in ’t aete goêzje. Gelökkig és hae vlot genógt kunne beginne as wêrkbegeleider beej De Risse. Heej és plaats vör völ minse di-j êrges ângers lastig aane bak kaome. Dét oeëze Hoeëgheid gaer wêrktj met minse, ’t leêfst zoeë verschillendj muuëgelik, keumtj dus good uut!

(foto’s: FLITZER! fotografeert)

As lid van ‘VV de Kuiters’ sleîpdje pap en mam de kleine Ruud en zus Renate al oeëverâl mej naotow. Inne buggy met ’n groeëte pruûk en de snoeët vôl schmink woorte de wichter al besmétj met ’t heerlikke vastelaovendjvirus. As opgrujjende jóng woort de Hoeëgheid lid van ‘VV de Ketsers’ en woeër hae as wagebawwer actief beej ‘VV de Flabusse’. Dus de Groeëte Rogstaekersoptocht és al bekindj terrein.
Met de ‘Kloeëtmejoeërs’ woort meînig fieëst bezochtj en wi-j in 1998 Noël I Seerden vanuut dieës club de Wieërter vastelaovendj vuuër ging woor Ruud eîn van zien gruuëtse Adjudânte.
Dét vastelaovendjsezoen woor extra bezûndjer want tiêdes ’t Boorebâl woort hae vör eine aovendj inne onecht verbónge met Boorebroêd Wendy Driessens. Dao bleêf ’t beej vör waat betreftj relaties met vrölluj.

Jaorelânk hieët oeëze vuuërgânger oppe bühn vanne Boonte Aovendje gestânge met de ‘Vastelaovendjzêngers’ en allewiel és hae achter de schêrme actief as grimeur en bösseltj hae mette klei-jer.
Zînge deût hae nog regelmaotig beej Fieëstband Dial24 en as hae, al kui-jerendj, óngerwieëges és met e meziekske op z’ne kop.
Wieter stieët hae nog ’s gaer inne kuuëke. Thoês of beej bevrîndje cateraars, want ’t bloôd kruuëptj woeë ’t neet gaon kân. Mer ’t allerleêfst pôngeltj oeëze Preens wat met vêrf of schmink. Oppe moor, ‘ne raam of ’n schoeën snoeët.

Ziêne Dorstlustige Hoeëgheid hieët de ‘Orde vanne Boonte Muuële’ ingestéldj.
De muuële kûmtj neteurlik van de bakkeri-j van opa, di-j de ‘Binnemuuële’ hédje en ’t boont keumtj vanne alle kluuëre vanne raengelboeëg, umdet ederein in oeëze gewêldjige vastelaovendj mej moôg drejje!

Same met zien Adjudânte Marc Beelen, Frank Driessen en Roy Truijen zâl Preens Ruud I de Wieërter vastelaovendj kluuër gaeve ónger zien devies:

Vastelaovendj vör ederein,
dao drejtj ’t um!